Një ngjarje e rëndë ka ndodhur në Cadiz të Spanjës, ku një burrë 57-vjeçar ka humbur jetën gjatë festivalit tradicional “Toro del Gayumbo”.
Pamjet e publikuara tregojnë momentin kur viktima përpiqet të ngjitet dhe të mbahet pas hekurave të një dritareje, por humb ekuilibrin, rrëzohet dhe sulmohet disa herë nga demi me emrin Mosquetero.
Pas tragjedisë, autoritetet vendore shpallën një ditë zie dhe anuluan shfaqjen e fishekzjarrëve të planifikuar për në mbrëmje. Ngjarja ka tronditur komunitetin lokal, ndërsa nuk kanë munguar kritikat për organizimin e këtyre eventeve, të cilat, sipas banorëve, përbëjnë rrezik si për njerëzit, ashtu edhe për kafshët.
Raste të ngjashme janë regjistruar edhe në rajone të tjera të Spanjës gjatë viteve të fundit, duke rindezur debatin mbi masat e sigurisë në festivalet tradicionale me demat.
