28-vjeçari Ragip Gila u arrestua si autori i masakrës me dy të vrarë dhe dy të plagosur, të regjistruar mëngjesin e kësaj të hëne në qytetin e Shkodrës. Ai nuk është një emër i panjohur për Policinë, pasi konsiderohej si anëtar i grupeve kriminale në kryeqendrën e veriut, teksa kishte vetëm disa muaj që ishte liruar nga burgu.
Por, ky atentat vjen vetëm pak ditë, pas ngjarjes tjetër të rëndë kriminale, ku mbrëmjen e të enjtes ekzekutua me armë zjarri 34-vjeçari Kristian Kola. Ngjarja ndodhi rreth orës 22:30, në një lokal tek kinema “Republika”, në lagjen “Vasil Shanto”.
Në atë atentat ishin dy persona me motor, njëri në rolin e qitësit dhe tjetri në rolin e drejtuesit, teksa motomjeti u gjet pas dy ditësh i djegur në fshatin Vakatanë.
Ky atentat mbetet ende i pazbardhur, teksa burime për mediat bëjnë me dije se nga analizat e kamerave dhe hetimet paraprake, autori i të dy ngjarjeve ka tipare fizike të ngjashme dhe përdor një mënyrë të ngjashme ekzekutimi.
Hetuesit dyshojnë se për shkak të ngjashmërisë fizike dhe mënyrës së kryerjes së atentatit, ku hapet zjarr nga një motor, dyshohet se kemi të bëjmë me të njëjtin autor. Autori i të dyja ngjarjeve ishte me dy armë dhe me një bidon benzinë.
Ndryshe nga shënjestra e sotme, Erogen Vaso alias Erogen Brajoviç, në atentatin e të enjtes, Kristian Kola rezultonte një person pa precedent penal, teksa ai kishte një firmë ndërtimi së bashku me babain. Nuk dihet nëse dy atentatet kanë lidhje me njëra-tjetrën apo jo.
Kujtojmë se në atentatin e sotëm, shënjestra Erogen Vaso alias Brajoviç mbeti i plagosur, ndërsa iu vra truproja 31-vjeçar Liridon Kraja alias Liridon Lushi. Po ashtu u vra edhe shtetasi Armando Pali, punonjës i IMT-së Shkodër dhe ish-anëtar i Këshillit Bashkiak, ndërsa u plagos 25-vjeçarja Meri Kaceri, e cila dyshohet se punonte si kamariere në lokalin ku ndodhi ngjarja.
