Turqia ia doli të merrte një fitore të madhe ndaj Serbisë në Eurobasket.
Në Arenën e Rigës, në Letoni, u luajt një duel i madh, i fundit në grupin A, ndërsa në fushë ishin edhe dy lojtarë të lindur në Shqipëri e Kosovë.
Erxhan Osmani, 27 vjeç, lindur në Bajram Curri të Tropojës, dhe Kenan Spahiu, lindur në Prishtinë 30 vjet më parë.
Osmani ishte titullar, një basketbollist mjaft shtatlartë prej 2 metrash e 13 centimetrash, dhe përballë Serbisë ishte një nga më të mirët në parket, me 10 pikë, 5 topa në tabela, 2 asistë e 2 vjedhje topi.
Trajneri Ataman e aktivizoi gati 35 minuta. Natyrisht, ai ishte një nga ata që ndihmuan yllin kryesor, Alperen Shengyn, më të mirin lojtar të ndeshjes që ishte vendimtar me 28 pikë, 13 topa në tabela, 8 asistë dhe 1 vjedhje topi.
Kenan Spahiu, që për turqit sot është Sipahi dhe mund të jetë me origjinë të përzier shqiptaro-turke, pati 5 pikë në 20 minuta, ndërsa kulmi I tij në këtë Europian ishte ndaj Letonisë shtatë ditë më parë kur shënoi 19 pikë, kapi 4 topa në tabela e shërbeu 3 asistë, duke u shpallur basketbollisti numër 1 i ndeshjes.
Duke u kthyer tek Osmani, tropojani 27-vjeçar është një emër shumë I njohur I këtij sporti që ka luajtur më parë me Beshiktashin, ndërsa tani është në Euroligë me Anadolu Efesin, dhe mbahet mend për paraqitjen e shkëlqyer në një duel ndaj Partizanit të Beogradit me 25 pikë, 6 tabela e 4 asiste.
