Kryeministri izraelit, Benjamin Netanyahu, ka reaguar me skepticizëm ndaj njoftimit të Hamasit, i cili të mërkurën në mbrëmje deklaroi gatishmërinë për të arritur një marrëveshje gjithëpërfshirëse, për të liruar pengjet dhe për t’i dhënë fund luftës.
“Fatkeqësisht, ky është një tjetër marifet mediatik nga Hamasi, i cili nuk përmban asgjë të re. Lufta mund të përfundojë menjëherë, por vetëm sipas kushteve të përcaktuara nga Kabineti i Sigurisë. Lirimi i të gjitha pengjeve; çmontimi i arsenalit të Hamasit; demilitarizimi i plotë i Rripit; kontrolli i sigurisë izraelite mbi Rripin; dhe krijimi i një administrate civile alternative që nuk përbën kërcënim për Izraelin,” tha Netanyahu.
Kryeministri shtoi se Këshilli i Sigurisë ka miratuar planin për pushtimin e Rripit të Gazës në disa faza, me qëllim mposhtjen e plotë të Hamasit. Ai theksoi se çdo përfundim i konfliktit do të jetë i mundur vetëm sipas kushteve të Izraelit, duke përfshirë tërheqjen e forcave pushtuese, hapjen e kalimeve për mallrat dhe nevojat e popullsisë dhe nisjen e procesit të rindërtimit.
Hamas, nga ana e tij, kishte deklaruar më parë gatishmërinë për të formuar një qeveri të pavarur kombëtare të përbërë nga teknokratë, e cila do të menaxhojë në mënyrë gjithëpërfshirëse punët e Rripit të Gazës dhe do të marrë menjëherë të gjitha përgjegjësitë në të gjitha fushat.
