Policia e Vlorës ka arrestuar shoferen italiane, e cila ditën e djeshme shkaktoi aksidentin tragjik me dy viktima në autostradën Levan-Vlorë, në afërsi të fshatit Panaja. Ngjarja ndodhi rreth orës 14:15, në vendin e quajtur “Kripa”.
Në pranga është vënë shtetasja italiane Angela Tanzillo, 28 vjeçe, banuese në Napoli, e cila akuzohet për veprën penale “Shkelja e rregullave të qarkullimit rrugor”.
28-vjeçarja italiane drejtonte një automjet tip “Dacia” me targa AA408XY në momentin kur përplasi nga pas një kamionçinë tip “Benz”. Si pasojë e goditjes, kamionçina u përoplas fillimisht me barrierat anësore të autostradës dhe më pas u përmbys anash rrugës.
Si pasojë e aksidentit, drejtuesi i kamionçinës Ferdinand Hasani, 63 vjeç, humbi jetën në vendin e ngjarjes, ndërsa pasagjeri në mjet Artan Muho mbeti i plagosur rëndë dhe u dërgua me urgjencë në spital, por sërish nuk arriti dot t’u mbijetonte plagëve të marra, duke ndërruar jetë disa orë më vonë.
