Ministri i Jashtëm belg, Maxime Prevot, ka njoftuar se Belgjika do të njohë zyrtarisht shtetin e Palestinës gjatë punimeve të Asamblesë së Përgjithshme të Kombeve të Bashkuara, që do të mbahet nga data 9 deri më 23 shtator në New York.
“Palestina do të njihet nga Belgjika në sesionin e OKB-së dhe masa të forta sanksionesh po vendosen kundër qeverisë izraelite,” shkruan Prevot në platformën “X”.
Prevot thekson se vendimi u mor “duke pasur parasysh tragjedinë humanitare” që po ndodh në Gaza, ku ofensiva e Izraelit ka zhvendosur shumicën e popullsisë.
“Përballë dhunës së kryer nga Izraeli në shkelje të së drejtës ndërkombëtare, dhe duke pasur parasysh detyrimin për të parandaluar çdo rrezik gjenocidi, Belgjika duhej të merrte vendime të forta për të rritur presionin mbi qeverinë izraelite dhe mbi terroristët e Hamasit,” shton ai.
Ky vendim vjen pas deklaratës së presidentit francez Emmanuel Macron në korrik, i cili konfirmoi se Franca gjithashtu do të njohë Palestinën.
Spanja, Irlanda dhe Norvegjia morën këtë hap vitin e kaluar, duke synuar të ushtrojnë presion diplomatik për të siguruar armëpushim në Gaza. Aktualisht, Shtetin e Palestinës e njohin 147 nga 193 vendet anëtare të Kombeve të Bashkuara dhe në OKB ka statusin e “vëzhguesit të përhershëm”, që i jep të drejtë pjesëmarrjeje pa të drejtë vote.
La Palestine sera reconnue par la Belgique lors de la session de l’ONU ! Et des sanctions fermes sont prises à l’égard du gouvernement israélien. Tout antisémitisme ou glorification du terrorisme par les partisans du Hamas sera aussi plus fortement dénoncé.
Au vu du…
— Maxime PREVOT (@prevotmaxime) September 2, 2025
