Emir Allen, një ekspert i njohur shqiptar i kriptomonedhave që jeton në Britani të Madhe, denoncon një fenomen shqetësues të mashtrimeve online. Ai tregon se grupe të skemave piramidale përdorin profile të rreme në Instagram për të fituar besimin e investitorëve dhe për të tërhequr para.
Para disa muajsh, fotot dhe informacionet personale të Allen u vodhën dhe u manipuluan me ndihmën e inteligjencës artificiale, duke e paraqitur atë si një “boss” i kriptovalutave me një jetë luksoze dhe investime të mëdha. Kjo krijoi një imazh të rremë për të mashtruar njerëz nga e gjithë bota.
“Mu vodh profili ku tregonin jetën e luksit dhe sa para bënin, më merrnin fotot dhe materialet nga rrjetet sociale dhe nga kompania ku unë punoj. Krijohej një imazh i rremë për të tërhequr më shumë investitorë,” shprehet Allen.
Problemi nuk është vetëm virtual. Burime nga TCH tregojnë se në Shqipëri paratë dorëzohen edhe në pika fizike, si në Lushnjë, Lezhë dhe Divjakë. Një lokal në Lushnjë përdoret për mbledhjen e këtyre parave. Edhe pse deputeti socialist Erion Braçe ka denoncuar fenomenin, asnjë mashtrues nuk është prangosur deri tani.
Skemat zakonisht krijohen jashtë Evropës , në Afrikë, Indi apo vendet baltike – dhe synojnë investitorë pa njohuri për botën e kriptomonedhave, zakonisht shtresën më të pambrojtur ekonomikisht. Vetëm gjatë muajit gusht, shqiptarëve u janë marrë rreth 20 milionë dollarë nga këto grupe, të cilat aktualisht operojnë të paktën gjashtë në vend./TopChannel
