Një skenë si në film aksion u shfaq ditën e sotme në detet e Greqisë, ku një i burgosur turk arriti të arratisej në mënyrë spektakolare nga katër oficerë policie, duke u hedhur i prangosur në det. Incidenti ndodhi gjatë transferimit të tij nga burgu i Korydallos në Mytilene, ndërsa anija e pasagjerëve “ARIADNI” po lundronte në zonën midis Kiosit dhe Oinousses.
I burgosuri po flinte në dyshemenë e anijes, i prangosur dhe i ruajtur nga katër policë. Me një lëvizje të papritur, ai u ngrit dhe vrapoi, duke i befasuar oficerët që nuk patën kohë ta ndalnin. Në momentin kritik, një qytetar i pranishëm në anije hapi derën e kuvertës, gjë që i mundësoi të burgosurit të arrinte aty dhe të binte në det.
Autoritetet greke arrestuan menjëherë katër oficerët e policisë me urdhër të një prokurori, ndërsa operacioni i kërkimit të i burgosurit nga anijet e Rojës Bregdetare nuk solli rezultat. Turku ishte arrestuar më 7 korrik 2025 për një rast kontrabande emigrantësh dhe po transferohej përpara autoriteteve gjyqësore në Mytilene.
