Një prej personazheve më të njohur të botës së krimit në Shqipëri, i përshkruar nga mediat britanike si “vrasës, gangster dhe drejtues bande”, vijon ende të qëndrojë në Mbretërinë e Bashkuar, ndonëse ka humbur betejën kundër deportimit.
Bëhet fjalë për 59-vjeçarin Maksim Çela, i njohur si pjesë e strukturave të dhunshme të Bandës së Lushnjës të drejtuar nga Aldo Bare. Gazeta britanike The Sun raporton se Çela ka depozituar një ankim të ri në Gjykatën e Apelit, duke zgjatur kështu procesin dhe duke u kthyer në një kosto të lartë për taksapaguesit britanikë.
Fillimisht, ai kërkoi azil me pretendimin se rivalët në botën e krimit do ta ekzekutonin nëse kthehej në Shqipëri. Më pas ndryshoi argumentin, duke nisur një betejë ligjore mbi bazën e të drejtave të njeriut dhe duke pretenduar se deportimi do ta vinte në rrezik torturash ose trajtimi degradues.
Në një vendim të mëparshëm, Çela arriti madje të siguronte edhe anonimitetin nga një gjykatës britanik, vendim që u rrëzua vetëm pas një beteje të gjatë 23-mujore të The Sun, që publikoi identitetin e tij.
Megjithëse humbi përballjen në gjykatë në muajin maj, ai vijon ping-pongun ligjor, duke shfrytëzuar mundësinë e apelimit.
“Ky rast i tmerrshëm tregon gjithçka që duhet të dimë për sistemin e prishur të azilit në Britani. Ky terrorist, gangster dhe vrasës policësh qartësisht nuk ka të drejtë të qëndrojë në Mbretërinë e Bashkuar, por po luan me sistemin si violinë dhe po qesh me ligjin”, deklaroi ish-ministri konservator i Drejtësisë, Robert Jenrick.
Çela ka lindur në Lushnjë dhe për vite ka pretenduar se ishte i punësuar në një klinikë dentare dhe në një spital. Por gjykata e azilit në Britani dëgjoi një version krejt tjetër: atë të një “terroristi të dhunshëm” që kishte planifikuar shpërthimin e një bombe në një stadium futbolli me 12 mijë spektatorë në vitin 2000. Për këtë çështje, ai u dënua në vitin 2001 me pesë vite burg në Shqipëri.
Në shtator të vitit 2006, Çela u dënua sërish me 25 vite burg për akte terrorizmi dhe armëmbajtje pa leje, të lidhura me vrasjen e një oficeri policie që luftonte krimin në Lushnjë. Pas lirimit në dhjetor 2022, ai mbërriti në aeroportin e Heathrow duke përdorur një pasaportë të falsifikuar, ku nisi edhe saga e tij e gjatë me drejtësinë britanike.
