Papunësia në Gjermani ka arritur mbi 3 milionë njerëz për herë të parë në më shumë se dhjetë vitet e fundit, sipas të dhënave të Agjencisë Federale të Punësimit në Nuremberg.
Numri i të papunëve u rrit në gusht me 46,000 krahasuar me muajin e kaluar, duke arritur në 3.025 milionë. Kjo është 153,000 më shumë se në gusht të vitit 2024, ndërsa shkalla e papunësisë u rrit në 6.4 përqind. Së fundmi, numri mbi tre milionë ishte regjistruar në shkurt të vitit 2015.
Andrea Nahles, drejtuesja e Agjencisë Federale të Punësimit, tha se tregu i punës karakterizohet ende nga stanjacioni ekonomik, por ka shenja të para të stabilizimit.
Rainer Dulger, president i Konfederatës së Shoqatave të Punëdhënësve Gjermanë, paralajmëroi se kjo shifër është një “pasojë e refuzimit për të zbatuar reformat” dhe kërkoi masa të shpejta gjatë vjeshtës.
Shkalla e papunësisë ndryshon ndjeshëm sipas landeve: Bremen (11.8%) dhe Berlin (10.5%) shënojnë nivele të larta, ndërsa Bavari (4.2%) dhe Baden-Württemberg (4.7%) qëndrojnë më të ulëta.
Megjithatë, ekspertët e Institutit për Kërkime të Tregut të Punës dhe Profesioneve (IAB) vërejnë shenja të përmirësimit. Në tre vitet e fundit, për herë të parë ata parashikojnë se rritja e papunësisë mund të ndalet dhe punësimi të rifitojë vrull.
Clemens Fuest, President i Institutit Ifo, rekomandon qeverisë federale të miratojë kundërmasa dhe reforma strukturore sa më shpejt për të nxitur investime private dhe hapjen e vendeve të reja pune.
