Deputetët e Kosovës do të mblidhen edhe këtë të shtunë, 30 gusht, në përpjekje për të arritur konstituimin e Kuvendit. Të enjten, kryetari i Kuvendit të Kosovës, Dimal Basha, zhvilloi seancën për të zgjedhur nënkryetarin e fundit, nga pakica serbe.
Por, seanca e së enjtes, 28 gusht, u ndërpre nga pasi nënkryetari nga pakica serbe nuk arriti që të merrte vota.
Gjatë kësaj seance nuk u zgjodh as Sllavko Simiçi, kandidati nga Lisa Serbe, e as Nenad Rashiçi që nuk gëzon mbështetjen e kësaj liste.
Kujtojmë se më 26 gusht, pas një ngërçi të gjatë politik, u zgjodh kryetari i Kuvendit të Kosovës, Dimal Basha. Zgjedhja e tij është i vetmi hap pozitiv prej muajsh, për konstituimin e Kuvendit dhe formimin e qeverisë së re, megjithatë nuk kanë munguar polemikat.
Votimi pro me shumicë i Bashës si kryeparlamentar i Kosovës, nuk u prit mjaftueshëm mirë nga vetë partia Lëvizja Vetëvendosje, duke u pasuar me dorëheqjet e para nga poste të rëndësishme.
Vlen të theksohet se Gjykata Kushtetuese ka urdhëruar Kuvendin të konstituohet brenda 30 ditësh, që nga 8 gushti, afat që ende nuk është zbatuar.
