Një 35-vjeçar nga Berati është arrestuar në Greqi, pasi ishte shpallur në kërkim ndërkombëtar me akuzat për vrasje me dashje të mbetur në tentativë, dhe mbajtje pa leje të armëve.
Policia njofton se në muajin maj 2021, në Poshnje, Berat, Fatjon Shabanaj, dyshohet se ka qëlluar me armë zjarri ndaj shtetasit I. I.
Arrestimi u bë i mundur falë bashkëpunimit të Policisë së Shtetit me autoritetet greke dhe Interpol-in ndërsa aktualisht po vijon procesi për ekstradimin e tij në Shqipëri.
“Falë informacionit të siguruar nga Departamenti i Policisë Kriminale në Policinë e Shtetit dhe shkëmbimit me Policinë greke, nëpërmjet Interpol Tiranës, u bë i mundur arrestimi në Greqi, me qëllim ekstradimin në Shqipëri, i shtetasit shqiptar Fatjon Shabanaj, 35 vjeç, lindur në Berat.
Ky shtetas ishte shpallur në kërkim ndërkombëtar nga Interpol Tirana, pasi Gjykata e Rrethit Gjyqësor Berat, në vitin 2021, i ka caktuar masën e sigurisë “Arrest në burg”, për veprat penale “Vrasja me dashje”, mbetur në tentativë dhe “Mbajtja pa leje dhe prodhimi i armëve, armëve shpërthyese dhe municionit”.
Në muajin maj 2021, në Poshnje, Berat, shtetasi F. Sh. dyshohet se ka qëlluar me armë zjarri ndaj shtetasit I. I., i cili si pasojë është plagosur.”– njofton policia.
