Katër fëmijët e 36-vjeçares shqiptare, Marjola Nakoleci, e cila u vra pak ditë më parë nga bashkëshorti i saj, 40-vjeçari Pandeli Nakoleci, do të zhvendosen për të jetuar me tezen e tyre në Skiathos, raportojnë mediat greke. Kujdestaria e katër fëmijëve do t’i jepet motrës së viktimës.
Avokatja e familjes ka raportuar se disa detaje mbeten për t’u përfunduar në procesin e caktimit të kujdestarisë, i cili pritet të formalizohet nesër në mëngjes nga Prokuroria e Shkallës së Parë e Volosit. Shërbimi Social ka dhënë një raport pozitiv, duke vërtetuar se tezja, e cila jeton dhe punon në Skiathos, është e aftë të marrë kujdestarinë. Të katër fëmijët janë dakord të qëndrojnë me tezen e tyre.
Ngjarja tragjike ka ndodhur në Volos, në pallatin ku jetonte familja, në rrugën Konstanta. Sherri mes çiftit filloi brenda apartamentit dhe më pas vazhdoi në hyrje të pallatit, ku 40-vjeçari Pandeli Nakoleci e goditi gruan me thikë në qafë dhe shpinë. Krimi ndodhi në sy të njërit prej fëmijëve, ndërsa të tjerët ishin brenda në banesë. Viktima vdiq nga gjakderdhja, ndërsa plagët mund të jenë shkaktuar nga thika ose përplasja me një dritare xhami.
Autori u largua në këmbë, por u kap nga policia një ditë më pas. Ai kishte precedentë për përdorim droge, shkelje ligjore për drogë dhe dyshohet se tentoi vetëvrasje më parë. Në fund të qershorit 2025, ai u transferua për ekzaminim psikiatrik dhe u shtrua në një klinikë.
