Gjykata e Juridiksionit të Përgjithshëm në Lushnjë ka vendosur masën e sigurisë “arrest me burg” për Xheison Toromenin, 25 vjeç, i akuzuar për vrasjen me thikë të 32-vjeçarit Besmir Kumria, ngjarje e ndodhur tre ditë më parë në fshatin Kryekuq, Bashkia Divjakë.
Sipas hetimeve paraprake, autori dhe viktima ishin banues në të njëjtin fshat dhe mes tyre kishte pasur konflikte të mëhershme për motive pronësie, konkretisht një vijë ujë.
Në seancën për caktimin e masës së sigurisë, Toromeni ka pranuar krimin, duke deklaruar se veprimi ishte shtyrë nga një ngjarje e ndodhur tre vite më parë, kur, sipas tij, viktima kishte dhunuar rëndë babanë e tij.
“E pashë ulur me dy persona të tjerë në tavolinë. Nuk durova dhe e qëllova disa herë me thikë. Dy personave të tjerë u thashë se nuk kam punë me ju dhe u largova”, ka deklaruar i pandehuri para trupit gjykues.
Çështja po hetohet nga prokurori Kristi Jorgji, ndërsa masa u caktua nga gjyqtarja Aurora Tushe.
Për Toromenin, është caktuar avokat mbrojtës i vendosur nga gjykata.
Hetimet vijojnë për të zbardhur plotësisht rrethanat dhe motivet e ngjarjes së rëndë që tronditi komunitetin lokal.
