Një ngjarje e rëndë ka ndodhur mesditën e sotme në qendër të kryeqytetit, ku u raportua se ish-Zv/ Drejtori i Përgjithshëm i AKSHI-t, Daniel Shima është zhdukur në mënyrë të mistershme.
U raportua se familjarët e ish-zv/drejtorit të përgjithshëm të AKSHI-t, Daniel Shima, kanë denoncuar në Komisariatin nr. 1 humbjen e kontakteve me të.
Sipas tyre, Shima u ka dërguar një mesazh të afërmve, duke i njoftuar se po e arrestonin, por pas këtij momenti, komunikimi me të është ndërprerë.
Ndërkohë, u bë me dije se policia po kryen sekuestrimin e kamerave të sigurisë në zonën ku dyshohet se ndodhej Shima, me qëllim zbardhjen e rrethanave të ngjarjes.
Ndërsa ZËRI shkruan se ka mësuar se Policia po heton dy pista, pengmarrjen ose një inskenim të mundshëm të zhdukjes.
Kujtojmë që më herët, Shima është thirrur për t’u pyetur në SPAK në lidhje me tenderat e Agjencisë Kombëtare të Shoqërisë së Informacionit (AKSHI).
Çfarë thotë policia?
Policia e Tiranës ka reaguar zyrtarisht në lidhje me zhdukjen e sh-Zv/ Drejtori i Përgjithshëm i AKSHI-t, Daniel Shima.
Policia bën me dije se ka qenë nëna e Daniel Shimës që ka denoncuar në Komisariatin e Policisë Nr. 1, se ka humbur kontaktet me djalin e saj.
Në njoftim policia nuk jep detaje për pistat e hetimit që po kryen për rastin e Shimës.
“Më datë 20.08.2025, rreth orës 17:00, në Komisariatin e Policisë Nr. 1 është paraqitur shtetasja M. Sh., e cila ka kallëzuar se ditën e sotme ka humbur kontaktet me djalin e saj, shtetasin D. Sh., 34 vjeç.
Shërbimet e Policisë po punojnë për sqarimin e rrethanave të rastit dhe për gjetjen e tij”, njoftoi Policia.
Kush është Daniel Shima?
Daniel Shima ka mbajtur për disa vite postin e numrit 2 të AKSHI-t, drejtpërdrejt pas drejtoreshës së institucionit, Mirlinda Karçanaj. Ai u shkarkua në mars 2024, pikërisht ditën kur Karçanaj u thirr për disa orë në Prokurorinë e Posaçme (SPAK). Pas daljes nga SPAK, Karçanaj është rikthyer në zyrë dhe ka firmosur shkarkimin e tij.
Ndaj Shimës janë bërë akuza publike gjatë kohës që ishte në detyrë në lidhje me abuzimet dhe vjedhjet e tenderave të organizuara nga AKSHI, ndërsa një vit më parë u raportua se ai ishte marrë nën mbrojtje nga Garda e Republikës, me vendim të posaçëm, për shkak të një rreziku të konstatuar nga institucionet ligjzbatuese. Megjithatë, nuk pati kurrë informacion zyrtar nëse ai ishte realisht i kërcënuar apo përse konsiderohej se i rrezikohej jeta.
Pak kohë më parë, edhe ish-zv.kryeministri Arben Ahmetaj deklaroi publikisht se Daniel Shima ka qenë i kërcënuar, duke ngritur edhe më shumë pikëpyetje mbi çështjen.
Zhdukja e tij e sotme hap sërish debat mbi prapaskenat e tenderave me vlerë miliarda lekë në AKSHI dhe përplasjet e mundshme brenda këtij institucioni kyç për menaxhimin e sistemeve shtetërore të teknologjisë dhe informacionit.
Vijon…
