Agjencia e Mbikëqyrjes Policore ka arrestuar në flagrancë një efektiv të Forcave të Posaçme “Shqiponja”, i cili shkaktoi një aksident në qytetin e Durrësit.
Në pranga ka rënë inspektori A. B., me detyrë trupë shërbimi pranë DVP Durrës, i dyshuar për veprat penale “Drejtim i automjetit në mënyrë të parregullt” dhe “Mosbindja ndaj urdhrit të punonjësit të policisë së rendit publik”.
Ngjarja ndodhi sot rreth orës 05:40, në rrugën “Egnatia”, ku efektivi duke drejtuar një automjet tip “Audi” humbi kontrollin dhe përplasi disa makina të parkuara, duke shkaktuar dëme materiale.
Gjithashtu bëhet e ditur se pas ngjarjes, atij iu kërkua të kryente testin e alkoolit, por ai ka refuzuar.
“Agjencia e Mbikëqyrjes Policore (Rajoni Durrës – Kavajë) ka arrestuar në flagrancë punonjësin e policisë Inspektor A. B., me detyrë Trupë Shërbimi i Forcës së Posaçme “Shqiponja” pranë DVP Durrës, i dyshuar për kryerjen e veprave penale “Drejtim i automjetit në mënyrë të parregullt” dhe “ Mosbindja ndaj urdhërit të punonjësit të policisë së rendit publik”
Arrestimi i tij u bë i mundur pasi ditën e sotme rreth orës 05:40, duke drejtuar automjetin tip “Audi” në rrugën “Egnatia”, ka humbur kontrollin dhe si pasojë ka përplasur disa automjete të parkuara duke shkaktuar dëme materiale. Në zbatim të procedurës standarte i është kërkuar të bëjë testin e alkoolit, por punonjësi ka refuzuar. Në këto kushte i është marrë monstër gjaku në ambientet e Spitalit Rajonal Durrës. Materialet proceduriale u referuan në Prokurorinë Pranë Gjykatës së Shkallës së Parë të Juridiksionit të Përgjithshëm Durrës.:, njoftoi policia.
