Presidenti i Ukrainës, Volodymyr Zelensky, ka reaguar pas takimit mes Donald Trump dhe Vladimir Putin, duke theksuar se synimi duhet të jetë “paqja e vërtetë” dhe jo “një tjetër pauzë mes pushtimeve ruse”.
Deklarata e tij erdhi pasi bisedimet e zhvilluara në Alaska nuk arritën të prodhonin një marrëveshje armëpushimi. Zelensky nuk ishte i ftuar në këto bisedime, çka ka nxitur kritika nga Kievi.
Presidenti amerikan, Trump, tha se palët duhet të ndjekin një marrëveshje paqeje afatgjatë midis Rusisë dhe Ukrainës, duke lënë mënjanë një armëpushim të përkohshëm.
Zelensky zhvilloi një bisedë telefonike me Trump dhe paralajmëroi se sanksionet ndaj Rusisë duhet të forcohen nëse nuk arrihet një takim trepalësh apo nëse Moska tenton të shmangë një zgjidhje të drejtë të konfliktit. Ai pritet të takohet me presidentin amerikan të hënën në Uashington.
Sipas mediave ndërkombëtare, SHBA dhe Ukraina po bëjnë presion për një takim mes Trump, Zelensky dhe Putin, por Kremlini ende nuk ka dhënë pëlqimin e tij.
