Shqipëria po përballet me një prej sezoneve më të rënda të zjarreve në 13 vitet e fundit. Sipas të dhënave nga Sistemi Europian i Zjarreve dhe Pyjeve, gjatë 7 muajve të parë të vitit 2025 janë djegur mbi 49 mijë hektarë tokë në të gjithë vendin.
Kjo është sipërfaqja më e madhe e prekur nga flakët që prej vitit 2012, kur në një vit të plotë u regjistruan vetëm 53 mijë hektarë të djegur. Deri tani janë evidentuar 93 vatra aktive zjarri në zona të ndryshme të vendit.
Në disa prej bashkive më të prekura si Delvinë, Finiq dhe Gramsh, raportohen dëme të konsiderueshme në bujqësi dhe blegtori. Sipas të dhënave paraprake:
Në fshatrat Tremul dhe Aliko (Finiq) janë djegur kullota dhe parcela me ullinj. Nuk raportohet për humbje në bagëti.
Në Njësinë Administrative Dhivër janë dëmtuar kullota dhe ullishte. Disa ferma janë evakuuar për të shmangur mungesën e ushqimit për bagëtitë.
Në bashkinë Delvinë dyshohet për djegien e një ferme me 25 krerë të imtash dhe 500 zgjoje bletësh.
Në fshatrat Skëndërbegas, Arunas, Shëmbërdhenjë, Bletës dhe Kullollas janë djegur 9 krerë gjedh, 95 krerë të imtash dhe 50 zgjoje bletësh. Deri më tani janë groposur 39 krerë bagëti të ngordhura.
