23 vatra zjarri aktive vijojnë të jenë aktualisht në Shqipëri, sipas raportimit më të fundit të Emergjencave Civile.
Ndër pikat më kritike është parku kombëtar i Syrit të Kaltë, ku raportohet se po punojnë mbi 200 forca, 11 automjete zjarrfikëse dhe avioni italian “Canadair” për të shuar zjarrin.
Po ashtu, situatë kritike vijon të jetë edhe në Poliçan, në zonat Zhapokikë, Plashnik dhe Rezervati Balloll, ku raportohet se në terren po operojnë tre helikopterë, dy nga Emiratet e Bashkuara Arabe dhe një nga Çekia.
Ndër zonat ku po zhvillohen operacione janë:
Syri i Kaltër (Delvinë) – Në Malin e Sopotit vijon puna intensive me 67 zjarrfikës, 80 efektivë të Forcave të Armatosura, 30 forca bashkiake dhe 30 forca mbështetëse. Në operacion ndihmon edhe avioni italian Canadair.
Pecë, Sirikat, Kardhikaq (Finiq) – Zjarr në shkurre dhe pyje, nën vëzhgim.
Kuç (Himarë) dhe Brataj (Selenicë) – Zjarre në sipërfaqe pyjore e shkurre, me forca zjarrfikëse në terren.
Mali me Gropa, Val (Bulqizë) – Dy vatra në zonë të mbrojtur, në monitorim nga AdZM dhe vullnetarë.
Tërnovë (Bulqizë) – Zjarr në pyje të dendura, me mbështetje nga një helikopter.
Zhapokikë, Plashnik, Rezervati Balloll (Poliçan) – Zjarr me përhapje të shpejtë; dje u evakuuan 20 banorë. Në operacion janë zjarrfikës, punonjës të AdZM, FA dhe tre helikopterë (2 nga Emiratet e Bashkuara Arabe dhe 1 nga Çekia).
Velçan (Berat) – Falë ndërhyrjes nga toka dhe ajri, u shmang rreziku për banesat; do të vijojë operimi deri në shuarje të plotë.
Zona të tjera nën kontroll ose monitorim përfshijnë: Orizaj (Skrapar), Vokopolë dhe Mbrakull (Poliçan), Ibë, Damjan-Fortuzaj, Isufaj, Ferraj dhe Zall-Herr (Tiranë), Spanesh, Kazie (Rrogozhinë), Dhuvjan, Lugar, Frashtan (Dropull), Hormovë (Tepelenë), Kullollas, Kodovjat, Ermenj dhe Mukaj, Sojnik (Gramsh), Kunorë Dardhë – Laku Klyz, Rrafshi i Sakatit (Fushë Arrëz), Gërmenj (Kolonjë) dhe Velës (Mirditë).
