CEO i OpenAI, Sam Altman, po përgatitet të hapë një kompani të re, Merge Labs, që do të garojë drejtpërdrejt me Neuralink-un e Elon Musk.
Sipas The Financial Post, startup-i do të përdorë inteligjencën artificiale për zhvillimin e ndërfaqeve tru-kompjuter dhe pritet të ketë një vlerë prej 850 milionë dollarësh, falë financimit kryesisht nga ekipi i investimeve të OpenAI.
Altman do të bashkëthemelojë kompaninë me Alex Blania, themelues i World – kompania e njohur për teknologjinë e skanimit të syrit – por nuk do të investojë personalisht kapital. Emri Merge Labs vjen nga koncepti i “bashkimit” të trurit me kompjuterin, ide që Altman e hodhi që në vitin 2017.
Kompania e re do të hyjë në një treg ku Musk ka nisur tashmë testimet e para te njerëzit me Neuralink, duke përfshirë pacientin kuadriplegjik Noland Arbaugh dhe një subjekt tjetër anonim që ka arritur të luajë lojëra FPS dhe të krijojë dizajne 3D me mendje.
Rivaliteti mes dy miliarderëve teknologjikë pritet të ashpërsohet, teksa përparimet e fundit në implantet trunore dhe AI po e afrojnë gjithnjë e më shumë momentin e “bashkimit” të njeriut me makinerinë.
