Është rritur bilanci duke shkuar në 8, numri i personave që janë transportuar për ndihmë mjekësore pas lëndimeve të shkaktuara nga zjarret që kanë përfshirë disa fshatra të Gramshit.
Burime zyrtare konfirmojnë se të lënduarit janë me djegie të lehta dhe të shkallës mesatare, ndërsa ndodhen nën kujdesin e mjekëve.
Ndërkohë, sipas autoriteve një numër i konsiderueshëm i të plagosurve të tjerë ndodhen ende në zonat e rrezikuara dhe nuk kanë mundur të transportohen në qytetin e Gramshit, për shkak të flakëve, tymit të dendur dhe vështirësive të terrenit.
Dyshohet se mund të ketë dhe nga ata që kanë mbetur të bllokuar mes flakëve që po përhapen me shpejtësi fshat më fshat.
Zjarri aktualisht ka përfshirë fshatin Harunas dhe ndërhyrja është e pamundur. Kjo për shkak se rruga është përfshirë nga flakët dhe rrezikohet jeta e emergjencave civile.
Më herët, Ministria e Mbrojtjes evakuuoi banorët në fshatrat Kullollas, Bletëz, Menkollar, Shimër, Skënderbegas, Spanesh dhe Kazie.
Në Kullollas humbi jetën një i moshuar, rreth 80 vjeç, pasi dyshohet se zjarri që ndezi në kopshtin e banesës i doli jashtë kontrollit dhe për pasojë u asfiksua. Flakët u përhapën në një zonë të gjerë.
