Vijon të jetë dramatike situata nga zjarret në Gramsh, ku janë evakuuar rreth 7-8 fshatra, të cilat po shkrumbohen nga flakët. Zjarri deri më tani ka shkatuar një viktimë dhe 8 të plagosur të konfirmuar, teksa ka dhe nga ata që nuk u dihet fati ende.
Një banore e fshatit Skënderbegas ka rrëfyer për mediat momentet e para se si u përhap zjarri në fshat dhe se si flakët “përpinë” çdo gjë, përfshirë shtëpitë dhe bagëtitë. Ajo tha se fshatin e braktisën të gjithë, ndërsa për një të moshuar u shpreh se nuk e kanë parë askund.
“Era e solli zjarrin aty. U dogjën shtëpitë e para. Kur u afruan afër shtëpive tona, i thashë burrit që të largoheshim. Dolëm mes flakëve dhe tymit. Shtëpitë kanë mbaruar, bagëtitë, lopët, viçat, gomarët. Të tërë ikën. Vetëm një të moshuar nuk e kemi parë, a doli a s’doli.
Atje te ne s’ka mbetur asgjë. Në fshatin tonë s’ka mbetur asnjë shtëpi. Komplet fshati ka mbaruar. U dogj një komunë e tërë. Nuk di çfarë të them…”, u shpreh banorja.
