Një shpërthimi fuqishëm ka ndodhur këtë të hënë në një fabrikë çeliku në Pensilvani të Shteteve të Bashkuara të Amerikës, si pasojë e të cilit deri më tani raportohet për të paktën një viktimë. Ndërkohë dy persona të tjerë janë raportuar të zhdukur.
BBC raporton se incidenti ka ndodhur US Steel Clairton Coke Works, një fabrikë e madhe në jug të Pittsburgh, në Pensilvani.
“Dy persona aktualisht konsiderohen të zhdukur, dhe disa të tjerë janë trajtuar për lëndime të ndryshme. Statusi i këtyre individëve nuk dihet ende.”, tha policia lokale.
Ndërkohë dyshimet janë se mund të ketë akoma më shumë viktima. Sipas CBS News, të paktën 15 ambulanca janë të pranishme në vendin e ngjarjes.
Guvernatori i Pensilvanisë, Josh Shapiro, tha se është informuar mbi ngjarjen dhe se po e ndjek situatën në fabrikën e çelikut dhe është në kontakt me shërbimet emergjente.
Ai shkroi në një postim në rrjetin social X: “Zona është ende aktive dhe qytetarët aty pranë duhet të ndjekin udhëzimet e autoriteteve lokale.”
Ende nuk dihet se çfarë e shkaktoi shpërthimin.
Departamenti i Shëndetësisë së Qarkut Allegheny u ka kërkuar banorëve afër fabrikës së çelikut që të mbajnë dritaret dhe dyert të mbyllura, pasi tym i dendur ka filluar të ngrihet pas shpërthimit.
Zyrtarët lokalë paralajmërojnë: “Për arsye sigurie, banorët brenda një rrezeje prej një milje nga fabrika këshillohen të qëndrojnë brenda, të mbyllin dritaret dhe dyert, të vendosin sistemet e ventilimit në mënyrën e qarkullimit të brendshëm dhe të shmangin përdorimin e pajisjeve që thithin ajër nga jashtë.”
Aktualisht nuk janë regjistruar nivele të rrezikshme të ndotjes së ajrit, por informacione të reja do të publikohen sapo të jenë të disponueshme.
Fabrika ka reaguar përmes presidentit dhe CEO-s së vet, David Burritt: “Po punojmë ngushtë me autoritetet për të hetuar shkakun e incidentit dhe do të japim informacion shtesë sapo të jetë i mundur.”
Ai shton: “Afërsisht 1 mijë e 300 burra dhe gra punojnë çdo ditë në fabrikën Clairton me përkushtim dhe siguri maksimale. Në momente si këto, punonjësit tanë bashkohen për të dhënë dashuri, lutje dhe mbështetje për të gjithë të prekurit.”
