Një tërmet me magnitudë 6.1 ballë goditi mbrëmjen e sotme provincën Balıkesir në Turqi, me epiqendër rrethin Sındırgı. Lëkundjet u ndjenë edhe në Stamboll dhe Izmir, duke shkaktuar shembjen e disa ndërtesave dhe panik mes banorëve.
Pamjet filmike të siguruara nga kamerat e sigurisë tregojnë momentin kur produktet binin nga raftet dhe qytetarët largoheshin të frikësuar nga lëkundjet e forta. Sipas mediave lokale, disa persona janë shpëtuar nga rrënojat.
Ministri i Mjedisit, Urbanizimit dhe Ndryshimeve Klimatike, Murat Kurum, njoftoi se ekipet po vijojnë vlerësimin e dëmeve dhe u bëri thirrje qytetarëve të shmangin hyrjen në ndërtesat e dëmtuara deri në përfundimin e kontrollit. Ai garantoi gatishmërinë e plotë të njësive emergjente dhe uroi shërim të shpejtë për të gjithë të prekurit.
