Policia e Fierit ka zbardhur plagosjen e dyfishtë me thikë të regjistruar mbrëmjen e së premtes, ku dy të rinj u paraqitën të plagosur në spital.
Sipas autoriteve policore, 28-vjeçari Albion Majaci është konfliktuar për motive të dobëta me vëllezërit e Edi Hoxha, 40 vjeç dhe vëllain e tij Loni Seitaj, 38 vjeç. Gjatë konfliktit, 40-vjeçari ka qëlluar me thikë Albion Majacin, por aksidentalisht ka plagosur në krah edhe vëllain e tij.
“Nga këto veprime dyshohet se në një rrugë të lagjes “11 Janari”, Fier, shtetasi A. M., 28 vjeç, banues në Fier, është konfliktuar për motive të dobëta, me shtetasit E. H., 40 vjeç dhe T. S., 38 vjeç banues në Kraps (vëllezër).
Gjatë konfliktit, 40-vjeçari ka goditur me mjet prerës shtetasin A. M., si dhe është dëmtuar në dorë në konflikt e sipër, vëllai i 40-vjeçarit, shtetasi T. S..” – thuhet në njoftim.
Edi Hoxha 40 vjeç, banues në fshatin Kraps është arrestuar nga Policia e Fierit për veprën penale “Vrasja me dashje” e mbetur në tentativë.
Materialet procedurale i janë referuar Prokurorisë së Fierit, për veprime të mëtejshme.
