Sot, më 8 gusht, përfundon afati i masës së përkohshme të vendosur nga Gjykata Kushtetuese e Kosovës për çështjen e konstituimit të Kuvendit. Vendimi i saj pritet të publikohet pas shqyrtimit të dy kërkesave të paraqitura nga Partia Demokratike e Kosovës dhe Lidhja Demokratike e Kosovës, të cilat kanë kërkuar sqarime për procedurat kushtetuese të konstituimit.
Nuk dihet nëse Kushtetuesja do të trajtojë edhe kërkesën e presidentes Vjosa Osmani, e cila ishte dorëzuar për të sqaruar pasojat në rast se Kuvendi nuk konstituohej deri më 26 korrik, por që ajo e tërhoqi më 5 gusht, duke përmendur si arsye gjyqtarin Radomir Llaban.
Në aktgjykimin e parë për këtë çështje, i cili nuk u respektua nga deputetët, Gjykata Kushtetuese nuk kishte përcaktuar pasojat juridike të moszbatimit të tij.
