Situata nga zjarret vijon të jetë problematike në disa zona të vendit. Flakët në Gjinoqarë të Bashkisë Patos mbeten aktive edhe këtë të enjte, ndërsa ndërhyrja e zjarrfikësve po bëhet me vështirësi për shkak të terrenit të thyer dhe bimësisë së dendur.
Kritike paraqitet edhe situata në Bashkinë Finiq, ku zjarri ka përfshirë fshatrat Dhivër dhe Shën Ndre. Për shkak të përhapjes së flakëve dhe rrezikut për banorët, autoritetet vendore morën vendimin për evakuimin e fshatit Dhivër gjatë natës. Fatmirësisht, deri tani nuk raportohen të lënduar.
Ndërkohë, në Poliçan vijon zjarri në zonën pyjore, larg territorit të uzinës së armëve.
Sipas informacioneve, zjarri në ambientet e uzinës ka rënë mesditën e djeshme, në një zonë të ndaluar për civilët dhe median. Situata u rëndua edhe më shumë për shkak të mungesës së ujit në hidrantët e uzinës, duke detyruar mjetet zjarrfikëse të furnizohen në qytet.
