Policia e Tiranës ka arrestuar noteren Majlinda Demollari, 57 vjeçe, e cila ishte shpallur në kërkim muajin e kaluar, pasi akuzohet se ka përpiluar dy herë kontrata për shitjen e të njëjtit apartament në pronësi të shtetasit Nani Kolovani, 48 vjeç, i arrestuar më parë.
Por, ajo nuk ka përfunduar në qeli, por pas arrestimit është liruar sërish. Kjo për shkak se blutë e kryeqytetit thonë se pas konsultimit me prokurorin e çështjes, e kanë proceduar penalisht në gjendje të lirë.
Noterja Majlinda Demollari akuzohet për veprën penale “shpërdorim detyre”.
“Specialistët për Hetimin e Krimeve Ekonomike dhe Financiare kapën shtetasen e shpallur në kërkim në kuadër të operacionit “Apartamentet”, M. D., 57 vjeçe, pasi dyshohet se duke shpërdoruar detyrën si notere, ka përpiluar 2 kontrata shitjeje për të njëjtin apartament. Në përfundim të veprimeve procedurale, pas konsultimit me prokurorin, për 57-vjeçaren nisi procedimi në gjendje të lirë, për veprën penale “Shpërdorimi i detyrës”.” – thuhet në njoftimin e Policisë.
