Presidenti rus Vladimir Putin do të jetë i hapur për një takim me presidentin ukrainas Volodymyr Zelensky, por vetëm pasi të jenë përmbushur të gjitha përgatitjet e nevojshme nga delegacionet e të dyja vendeve. Kështu deklaroi të hënën zëdhënësi i Kremlinit, Dmitry Peskov, gjatë një konference për shtyp.
Sipas Peskovit, një samit i mundshëm mes dy presidentëve mund të zhvillohet “vetëm kur të jetë bërë puna përgatitore në nivel ekspertësh dhe të jetë kapërcyer një distancë e mjaftueshme mes palëve”.
Nga ana tjetër, Zelensky ka pohuar se negociatat me Moskën do të kishin kuptim vetëm nëse ai dhe Putin përfshihen drejtpërdrejt. Megjithatë, Rusia vazhdon të vërë në dyshim legjitimitetin e presidentit ukrainas dhe këmbëngul që çdo takim i nivelit të lartë duhet të pasojë një dakordësi të gjerë për një marrëveshje paqeje.
