Deputetja demokrate Jorida Tabaku thotë se bujqësia shqiptare po vuan nga politika tatimore e gabuar, konkretisht rritja e TVSH-së në 20%. Sipas saj, kjo rritje ka prodhuar informalitet dhe ka nxjerrë jashtë tregut fermerët e vegjël.
“Nëse duam një model ekonomik që funksionon për fshatin, duhet të kthejmë TVSH-në në nivelet e mëparshme – në 6% ose, në mënyrën më të mirë, në 0%,” deklaroi Tabaku në nje video të publikuar në rrjetet sociale.
Ajo vuri në dukje se mbështetja për bujqësinë nuk bëhet vetëm me grante dhe skema të shkëputura, por përmes politikave tatimore që ndihmojnë prodhimin vendas dhe fuqizojnë prodhuesit e vegjël.
Sipas saj, një model ekonomik që lidh prodhuesit e vegjël me të mëdhenjtë dhe garanton konkurrueshmëri, mund të ndërtohet vetëm nëpërmjet incentivave të drejta fiskale.
“Përndryshe, fshati do të vdesë ashtu siç ka rënë deri më sot” përfundoi Tabaku.
Reagimi i plotë:
Pasuria më e madhe që ka Shqipëria është toka. Pasuria më e madhe që ka çdo fermer është toka. Aseti më i madh që na dhuron ne shumë është toka.
Fatkeqësisht, në bujqësi toka nuk shfrytëzohet siç duhet. Dhe ka një problem kryesor për bujqësinë shqiptare, i cili lidhet me skemën e TVSH-së.
Nëse duam një model ekonomik i cili punon dhe funksionon për fshatin, duhet patjetër që TVSH-ja për fshatin të kthehet në nivelet mëparshme. Duhet që TVSH-ja të zbresë në 6%, ose në 0%, që do të ishte rasti ideal.
Rritja e TVSH-së në 20% ka rritur informalitetin. Por, nga ana tjetër, ka bërë të mundur që një pjesë e madhe e fermerëve të vegjël të dalin jashtë tregut.
Nxitja e bujqësisë bëhet sigurisht nëpërmjet granteve, bëhet nëpërmjet skemave mbështetëse, por ajo që është më e rëndësishme – bëhet nëpërmjet taksës.
Krijimi i një modeli ekonomik që prodhon, që mbështet prodhuesit e vegjël, që i kthen ata në furnitorë të prodhuesve më të mëdhenj, bëhet vetëm duke rregulluar dhe duke nxitur prodhimin shqiptar nëpërmjet TVSH-së.
Përndryshe, fshati do të vdesë. Do të vazhdojë të bjerë, ashtu siç ka rënë deri më sot.
Mrekulli e natyrës këtu në Fishtë – jo më kot Fishta këtu gjente muzën për të shkruar aq bukur për Shqipërinë e për gjuhën shqipe.
