Kompania telefonike “One Albania” pothuajse çdo ditë denoncohet për një shërbim skandaloz ndaj klientëve të saj, ndërprerje valësh, si dhe për zhvatje “padrejtësisht” të qytetarëve.
Po ashtu, “One Albania” është konstatuar edhe për ndërprerje pa paralajmërim të shërbimit celular ndaj klientëve që vonojnë kryerjen e pagesës mujore ndaj kompanisë së telefonisë së lëvizsshme.
Abuzimet e kompanisë celulare “One Albania” kanë shqetësuar edhe deputetët e Kuvendit të Shqipërisë. Disa muaj më parë, deputeti i PS-së në Qarkun e Shkodrës, Frrok Gjini, gjatë fjalës së tij në Komisionin e Ekonomisë, ngriti për herë të parë shqetësimin se kompania “One Albania” u ka bllokuar celularët dhe politikanëve. Bllokimi i celularëve të politikanëve u konfirmua edhe nga kryetari i Komisionit, deputeti socialist Eduard Shalsi, i cili tha se deputetët kanë komunikuar vetë me kompaninë.
Ndërkohë, duket se “pre” e problematikave të “One Albania” ka rënë edhe gazetarja Denada Jushi, e cila përmes një postimi në rrjetet sociale, u ka kërkuar qytetarëve që të denoncojnë raste që përballen me tarifime me shuma të pajustifikueshme nga One Albania , me mungesë informacioni, përgjigje arrogante, mos pasje valesh dhe abuzime të vazhdueshme.
“Kush është duke u përballur me tarifime me shuma të pajustifikueshme nga One Albania , me mungesë informacioni, përgjigje arrogante, mos pasje valesh dhe abuzime të vazhdueshme, të më kontaktojë për rastet, ju lutem!” – shkruan gazetarja.
