Gjykata Kushtetuese ka “rrëzuar” SPAK-un, duke i pranuar pjesërisht kërkesën Onejda Ymerajt, bashkëpunëtores së ngushtë të “oligarkut të shëndetësisë”, Klodian Allajbeut, në lidhje me sekuestrimin e telefonit të saj.
Kushtetuesja ka konstatuar shkelje të të drejtave kushtetuese në veprimet e kryera nga Prokuroria e Posaçme (SPAK), duke vendosur që Ymerajt t’i kthehet telefoni i sekuestruar pa vendim gjykate, por ndërkohë, ka lejuar mbajtjen nën sekuestro të kopjeve të të dhënave që lidhen drejtpërdrejt me hetimin penal, duke kërkuar që ato t’i nënshtrohen kontrollit të mëtejshëm gjyqësor.
Sipas Kushtetueses, pranimi i pjesshëm i kërkesës është bërë pasi është konstatuar cenim i lirisë dhe fshehtësisë së korrespondencës, si dhe të së drejtës për mbrojtjen e të dhënave personale për pjesën që ato nuk lidhen me objektin e hetimit penal.
Gjykata Kushtetuese ka urdhëruar gjithashtu SPAK-un që brenda një afati 3-mujor, të marrë masat e nevojshme për të rivendosur ligjshmërinë procedurale në lidhje me këtë çështje, duke respektuar të drejtat e individit të mbrojtura nga Kushtetuta.
Onejda Ymeraj, e konsideruar si krahu i djathtë i Klodian Allajbeut të “Spitalit Amerikan”, i ishte sekuestruar telefoni nga SPAK në shkurt të vitit 2024 në kuadër të hetimeve për ish-kryeministrin Arben Ahmetaj.
Kujtojmë se Klodian Allajbeu është një prej biznesmenëve më të akuzuar në Shqipëri, teksa pak kohë më parë u paraqit për t’u marrë në pyetje edhe në Prokurorinë e Posaçme (SPAK), ku ka dëshmuar për rreth dy orë.
Allajbeu është përfolur si i përfshirë në dy nga dosjet e nxehta të shëndetësisë: atë të koncesionit të laboratorëve dhe dializës. Emri i tij u shfaq edhe në dosjen e Erion Veliajt, ku kanë udhëtuar së bashku në drejtim të Kinës, ku prokurorët nuk kanë marrë edhe përgjigje se kush i ka mbuluar shpenzimet për këtë udhëtim.
Gjithashtu, Klodian Allajbeu është nën hetim edhe nga Prokuroria Speciale e Kosovës, pasi akuzohet se në bashkëpunim me persona të tjerë kanë pastruar para përmes një skeme të falsifikimit të dokumenteve dhe prezantimit të dokumenteve false në Administratën Tatimore të Kosovës.
Lexo edhe:
Nga Gjiknuri te Klod Allajbeu, për kë janë dosjet që u hakeruan në SPAK (EMRAT)
