Detaje të reja janë zbuluar nga ngjarja e rëndë e ndodhur në Pogradec, ku 31 vjeçari Ilirjan Selmani vrau partneren e tij 52-vjeçare, Kozeta Teço. Autori ka përdorur thikën e bukës mbi 50 herë për t’i marrë jetën gruas. Pas ngjarjes, ai ka pastruar gjakun dhe i ka vënë zjarrin shtëpisë për të fshehur provat.
Pas shoqërimit në polici, 31-vjeçari ka mohuar të vërtetën. Ai ka deklaruar se me viktimën ishte prej tre vitesh i lidhur.
“Besoj në Zot. E doja, nuk më bënte përshtypje mosha. Vij nga një familje e mirë dhe nuk mund të bëhem vrasës”-ka deklaruar ai.
Autori pretendoi fillimisht se ditën e ngjarjes ka qenë në Korçë dhe kur u kthye në Pogradec mësoi se partnerja kishte vdekur. Pas 7 orësh pyetje ku u ballafaqua dhe me provat që ka në dorë policia, ai pranoi disa episode por jo vrasjen.
“Peshqirët me gjak i hodha në mbeturina duke menduar se mos në apartament ishte therur ndonjë pulë sepse bashkëjetuesja ishte e fiksuar pas pastërtisë”– ka deklaruar ai.
Më pas, pas ballafaqimit me pamjet filmike, dëmtimet që edhe ai vetë ka marrë gjatë përleshjes dhe eksperimentin hetimor të kryer në vendngjarje, 31 vjeçari shprehu pendesë dhe pranoi autorësinë e vrasjes para grupit hetimor.
Sipas tij, 52 vjeçarja ishte e alkoolizuar dhe deklaroi se kohët e fundit viktima ishte bërë agresive dhe e dhunonte.
Raportohet se Ilirjan Selmanit do t’i kryhet një vlerësim psikologjik.
