Situata humanitare në Gaza po përkeqësohet çdo ditë, me shifra alarmante për shkak të mungesës së ushqimit dhe ndihmave thelbësore. Sipas të dhënave të fundit të Programit Botëror të Ushqimit (WFP), një në tre banorë të Gazës kalon ditë të tëra pa ngrënë asgjë, ndërsa rreth gjysmë milioni njerëz jetojnë tashmë në kushte që klasifikohen si “uria e thellë”.
Që nga fillimi i ofensivës izraelite, hyrja e ndihmave në Rripin e Gazës është ndërprerë vazhdimisht. Nga marsi deri në mesin e majit, ushqimet, ilaçet dhe karburantet u ndaluan tërësisht. Edhe pse dërgesat kanë rifilluar në fund të majit, aktualisht hyjnë vetëm rreth 69 kamionë në ditë, shumë larg nevojës reale prej 500–600 kamionësh, sipas OKB-së.
Organizatat humanitare raportojnë se mbi 127 persona kanë humbur jetën nga uria, përfshirë të paktën 85 fëmijë. 1 mijë të tjerë janë vrarë pranë qendrave të shpërndarjes së ushqimit, përfshirë edhe pikat e ndihmës së Gaza Humanitarian Foundation, e cila ka shpërndarë mbi 94 milionë vakte, vetëm një e katërta e nevojshme për të përballuar krizën.
Sipas një raporti të FAO-s, nëse situata nuk ndryshon ndjeshëm, deri në shtator rreth 470 mijë palestinezë do të jetojnë në nivelin më të lartë të rrezikut sipas sistemit ndërkombëtar të klasifikimit të urisë, të njohur si IPC “Faza 5” që domethënë: katastrofë. 1 milion qytetarë pritet të futen në fazën “Emergjencë”.
Nga ana tjetër, edhe për ata që marrin ndihma, ushqimi është minimal dhe i njëtrajtshëm. Paketat përmbajnë kryesisht miell, makarona, qiqra, vaj dhe kripë, të pamjaftueshme për një ushqim të balancuar. Ekspertët paralajmërojnë se një dietë e tillë për një kohë të gjatë çon në “uri të fshehur” dhe rrit rrezikun për sëmundje si anemia dhe skorbuti.
Situata është përkeqësuar më tej edhe nga shkatërrimi i infrastrukturës bujqësore dhe peshkimit: mbi 80% e tokave të punueshme dhe puseve bujqësore janë jashtë funksioni, ndërsa mbi 70% e varkave të peshkimit janë dëmtuar ose shkatërruar.
Aktualisht, shpresa e vetme për banorët e Gazës mbeten ndihmat ndërkombëtare. WFP njofton se ka në dispozicion mbi 170 mijë tonë ushqime në rajon, të gatshme për shpërndarje, të mjaftueshme për tre muaj. Por kamionët vazhdojnë të mbeten në kufi. Ndërkohë, njerëzit presin. Dhe uria nuk pret.
