Një radhë e gjatë kamionësh të tonazhit të rëndë është krijuar në aksin Bardhoc–Vermicë të rrugës Morinë-Kukës, me drejtim nga Shqipëria drejt Kosovës. Kamionët, të parkuar në dy rreshta përgjatë rrugës, po presin për të hyrë në Kosovë përmes pikës doganore të Vermicës.
Kjo situatë ka ardhur si pasojë e masës së vendosur nga Ministria e Mjedisit dhe Transportit e Kosovës, e cila nga ora 11:00 deri në 17:00 ndaloi qarkullimin e mjeteve të tonazhit të rëndë në autostradat dhe rrugët rajonale, për shkak të temperaturave të larta që kanë përfshirë vendin.
Megjithëse orari i ndalimit ka përfunduar, kamionët vazhdojnë të presin për hyrje në Kosovë, kryesisht për shkak të kapaciteteve të kufizuara të autoriteteve doganore në kryerjen e procedurave.
Radha e kamionëve ka filluar që nga fshati Bardhoc dhe shtrihet deri te hyrja e doganës së Vermicës. Sot ishte dita e fundit e kësaj mase, e cila ka qenë në fuqi gjatë 15 ditëve të fundit të korrikut.
