Teksa Club Brugge përgatitet për sfidën e radhës në Pro League ndaj Genk-ut, trajneri Nicky Hayen komentoi “telenovelën” që ka përfshirë mesfushorin Ardon Jashari dhe interesimin e Milanit.
“Jashari është stërvitur me ne prej dy ditësh dhe po shkon shumë mirë – tha Hayen. – Ai ofron cilësi, është kënaqësi ta kesh në grup. Ajo që ndodh mbi kokat tona nuk varet prej nesh; jam i qetë për situatën.”
Mesfushori me origjinë nga Kosova (përfaqëson Zvicrën), i cili nuk mori pjesë në foton zyrtare të skuadrës disa ditë më parë, ka kontratë deri në 2029. Brugge ka bërë të qartë se çdo klub duhet të përmbushë kërkesat financiare për t’ia siguruar shërbimet.
Sipas medieve italiane dhe belge, Milani është gati të paraqesë një ofertë të përmirësuar: totali mbetet 37 milionë euro, por pjesa fikse ngrihet në 35 milionë, ndërsa 2 milionë mbeten bonuse, një hap më afër kërkesës 40-milionëshe të Brugge. Klubi belg, megjithatë, nuk ka treguar ende shenja lëshimi.
Hayen e mbylli me thirrjen për dialog: “Gjithçka duhet zgjidhur me bisedime të hapura; varet nga gjendja e çështjes dhe interesat e të gjitha palëve. Besoj se shumë shpejt gjithçka do të bëhet e qartë.”
Në horizont mbetet enigma: do të vazhdojë Jashari aventurën e tij në Belgjikë, apo do të marrë rrugën drejt “San Siros”? Tifozët e Brugge dhe Milani presin përgjigjen, teksa afati i merkatos po shkon drejt javëve vendimtare.
