Shqipëria është vënë sërish në qendër të kritikave në Parlamentin Evropian, këtë herë nga eurodeputeti gjerman Dr. Alexander Sell, i cili ka mbajtur një fjalim të ashpër kundër procesit të anëtarësimit të vendit në Bashkimin Evropian.
Gjatë fjalës së tij, Sell deklaroi se Shqipëria nuk i plotëson aspak kushtet demokratike për t’u bërë pjesë e BE-së, duke përmendur problematika të shumta si zgjedhje jo të lira, mungesë të lirisë së shtypit, korrupsion masiv dhe ndikimin e mafies në jetën ekonomike dhe institucionale të vendit.
“Zgjedhjet e majit patën shumë pak të bënin me demokracinë. Kryeministri Rama burgos kundërshtarët politikë, vëzhguesit ndërkombëtarë folën për blerje masive të votës, ndërsa gjatë fushatës u mbyll edhe TikTok-u. Liria e shtypit thuajse nuk ekziston”, deklaroi ai.
Sell shkoi më tej duke e quajtur Shqipërinë “Kolumbia e Evropës”, për shkak të rolit që sipas tij ka mafia shqiptare në trafikun e kokainës dhe marihuanës në kontinentin evropian. “Nga pikëpamja ekonomike, përfitimet kryesore Shqipëria i ka nga trafiku ndërkombëtar i drogës. Mafia shqiptare kontrollon me brutalitet ekstrem trafikun në mbarë Evropën. Shumë miliarda vërshojnë çdo vit në Tiranë”, theksoi ai.
Eurodeputeti gjerman kritikoi gjithashtu zhvillimet urbane të Tiranës, duke thënë se ndërtimet e reja dhe qiellgërvishtet janë produkt i pastrimit të parave. “Qeveria ka pjesën e saj në këtë biznes. Korrupsioni është i gjithëpërhapur, aq sa edhe fondacioni Rosa Luksemburg e përshkruan situatën si ‘kontroll kleptokratik të shtetit nga Partia Socialiste’”, deklaroi Sell.
