Albi Alla mbylli një sezon pozitiv me Flamurtarin, duke ndihmuar ekipin të ngjitet në elitën e futbollit shqiptar, por me vendimin e fundit ai ka surprizuar.
Përmes një njoftimi në rrjetet sociale, klubi grek PO Atsaleniou, i cili militon në Kategorinë e Tretë të futbollit ka njoftuar se ka arritur marrëveshje me mbrojtësin shqiptar Albi Alla.
32-vjeçari ka firmosur kontratë 1 vjeçare, e vlefshme deri në verën e vitit 2026. Vlen të përmendim se Alla ka djerësitur fanellën e Kombëtares sonë në vetëm 1 rast. Aventura në Greqi nuk është “terren i pashkelur”, ai e ka nisur karrierën në tokën helene.
“Kategoria e tretë është një eksperiencë e re për mua, një kategori me të cilën nuk kam familjaritet, por jam i sigurt se do të përshtatem shumë shpejt. E di historinë dhe rëndësinë e fanellës së P.O. Atsaleniou dhe jam i lumtur që tani i përkas familjes së kësaj skuadre”, fjalët e para të Allës si pjesë e PO Atsaleniou.
