Departamenti i Shtetit në SHBA ka nisur një hetim ndaj Universitetit të Harvardit për të vlerësuar nëse institucioni arsimor duhet të vazhdojë të marrë pjesë në programet federale të shkëmbimit të vizitorëve.
Hetimi, i udhëhequr nga Sekretari i Shtetit Marco Rubio, ka për qëllim të verifikojë nëse Harvard respekton rregullat federale, sidomos në mënyrën se si zbaton programet që lidhen me interesat e politikës së jashtme dhe sigurinë kombëtare të Shteteve të Bashkuara.
“Njerëzit në SHBA kanë të drejtë të presin që universitetet e tyre të mbrojnë sigurinë kombëtare, të respektojnë ligjin dhe të ofrojnë një mjedis të sigurt për të gjithë studentët”, thuhet në deklaratën zyrtare të DASH-it.
Nuk janë dhënë ende detaje mbi çfarë e ka nxitur konkretisht hetimin, por lëvizja vjen në një klimë të tensionuar mes institucioneve akademike dhe administratës së re republikane në Uashington. Harvard nuk ka reaguar zyrtarisht ndaj hetimit.
