Ndërsa sezoni turistik po arrin kulmin, Rama me “kokëfortësinë” e tij ka vendosur të ndërmarrë një tjetër aksion duke rrafshuar të tjera godina dhe biznese që operojnë në Llogara.
Burime për Boldnews.al bëjnë me dije se punonjës të IKMT, të identifikuar me automjete dhe bluza zyrtare, kanë trokitur derë më derë te bizneset lokale, duke kërkuar dokumentacionin dhe duke lënë të kuptohet qartë se fadromat, me porosi direkte nga Edi Rama, janë gati të rrafshojnë çdo ndërtim “të padëshiruar” nga qeveria. Në listën e objekteve të rrezikuara janë përfshirë edhe ndërtime ikonike të zonës, si “Sofos” apo ish-kampi i punëtorëve.
Ndërhyrja në këtë moment të sezonit njejtë si në Theth do të pritet me zemërim dhe shqetësim nga komuniteti lokal, që prej më shumë se 20 vitesh zhvillon aktivitetin në zonë. Shumica e ndërtimeve janë ngritur mbi prona të trashëguara ose me dokumentacion të vjetër të tipit “kullotë”. Për vite me radhë institucionet kanë qëndruar në heshtje, ndërsa tani aksioni i beftë në korrik shihet si çmenduri.
Në vend që të forcojë shtetin ligjor, kjo ndërhyrje në mes të sezonit po përjetohet si një sabotim i qëllimshëm ndaj turizmit vendas dhe investimeve të banorëve të zonës.
Duket se strategjia e qeverisë për “pastrimin” e zonave turistike po ndjek një logjikë të çuditshme, injorim për vite me radhë dhe më pas veprim të beftë në muajt më të rëndësishëm për ekonominë lokale./Boldnews.al
