12 kandidatët e listës së mbyllur të Partisë Social-Demokrate të Qarkut të Tiranës kanë dorëzuar dorëheqjen në Komisionin Qëndror të Zgjedhjeve, duke mos e pranuar mandatin e fituar nga kjo forcë politike.
Nisur nga kjo situatë, Komisioneri Shtetëror i Zgjedhjeve, Ilirjan Celibashi ia ka dhënë mandatin e deputetit kandidatit më të votuar të listës së hapur. Bëhet fjalë për kandidatin Tedi Mula, i cili në zgjedhjet parlamentare të 11 Majit, arriti të merrte 2 503 vota preferenciale.
“Për kandidatët fitues të listës së PSD-së, lidhur me këtë subjekt zgjedhor është depozituar kërkesa, me objekt dorëheqjen e të gjithë kandidatëve të listës së fiksuar. Për sa më lart në këtë relacion, KQZ-së i propozohet shpërndarja e mandatëve dhe përcaktimi i kandidatëve fitues në qarkun Tiranë nga lista e hapur.” – u tha në mbledhjen e sotme të KQZ-së drejtuar nga Ilirjan Celibashi.
Kujtojmë se PSD më 11 Maj mori edhe dy mandate në Qarkun e Shkodrës, por nuk dihet se si do veprojë kjo forcë politike për mandatet në këtë qark, ku i pari në listë renditet kreu i partisë, Tom Doshi.
Tom Doshi dha dorëheqjen në vitin 2021, duke mos hyrë në Kuvend, teksa ai është i shpallur “non grata” nga SHBA.
