Bayern Munich ka larguar tre lojtarë sulmues këtë merkato: Leroj Sane (29), Tomas Myler (35) dhe Matis Tel (20). Kërkimi për talente të reja në repartin ofensiv deri më tani ka qenë i pasuksesshëm.
Florian Virtz i Leverkusenit nuk mundi dot të zbarkonte në Mynih (u transferua te Liverpuli), ashtu sikurse edhe Niko Uilliams, i cili rinovoi kontratën me Atletiko Bilbaon.
Lojtarët e PSG-së, Bredli Barkola (22) dhe Desire Doue (20), që ndodheshin në listën e Bajernit, nuk janë lëshuar nga klubi. Ndërkohë, loja e pokerit për Luis Díaz-in (28, Liverpul) dhe Nik Voltemejd (23, Shtutgart) vazhdon intensivisht.
Pse e ka kaq të vështirë Bajerni në merkato në këtë moment? Nga këndvështrimi i legjendës së portës, Oliver Kahn (56), mungesa e vazhdimësisë është një nga arsyet pse Bavarezët shpesh kanë mbetur mbrapa në rekrutimin e yjeve ndërkombëtarë. “Shumë trajnerë kanë ardhur dhe shkuar. Si rezultat, filozofitë dhe idetë kanë ndryshuar vazhdimisht, ashtu si edhe skuadra. Gjithmonë ndihet si një tronditje e vazhdueshme e formacionit”, tha Kahn në një intervistë për Skaj.
E gjithë kjo “natyralisht krijon një lloj shqetësimi”, tha ishportieri dhe drejtori ekzekutiv i Bajernit, “dhe jam mjaft kritik ndaj vetes, mos më keqkuptoni. Edhe gjatë kohës sime, këto çështje të vazhdimësisë në të gjitha fushat janë diçka që do të doja t’i kisha bërë më mirë”.
Kahn, i cili ishte drejtori ekzekutiv i Bajernit nga 2021 deri në 2023, gjithashtu dyshon se “Bundesliga është ende aq joshëse për këta lojtarë”. Ai thotë: “Dua të them, Bajerni e ka fituar kampionatin dymbëdhjetë herë në 13 vitet e fundit. Mendoj se duhet të mendojmë seriozisht nëse do të ndryshojë diçka”. Ndërkohë që Bundesliga mbetet “një institucion gjigant” në Gjermani, Kahn thotë se atraktiviteti i futbollit në këtë vend mund të jetë “i mashtrueshëm”, duke marrë parasysh mungesën e trofeve ndërkombëtarë.
