Gjykata e Tiranës ka vendosur të lirojë nga qelia Edison Haxhiun, i akuzuar për përfshirje në vrasjen e Gentian Bejtjas, ngjarje e ndodhur më 15 mars 2024 në fshatin Larushkë të Fushë-Krujës.
Vendimi është marrë pas pranimit të kërkesës së avokatit mbrojtës Sokol Tahiraj, i cili argumentoi se ishin tejkaluar afatet ligjore të paraburgimit dhe për këtë arsye kërkoi shuarjen e masës së sigurisë. Gjykata pranoi kërkesën dhe urdhëroi lirimin e Haxhiut.
Sipas Prokurorisë së Tiranës, e cila po ndjek hetimet për këtë ngjarje, Edison Haxhiu dyshohet se ka bashkëpunuar me Ilir Beqarajn në atentatin ndaj Bejtjas. Prokurori i çështjes, Ritvan Suka, ka theksuar se Haxhiu është hetuar për krijim të kushteve për të kryer vrasje.
Ndërkohë, Prokuroria ka dërguar për gjykim një nga personat e dyshuar si të përfshirë në atentat, Ilir Beqarajn, i cili akuzohet se ndihmoi autorin kryesor të dyshuar të vrasjes, Flodian Plaku, i njohur edhe me nofkën “Pole Qorri”. Ky i fundit vijon të jetë në kërkim.
Sipas të dhënave hetimore, Beqaraj dyshohet se ndihmoi Plakun të largohej nga vendngjarja dhe më pas dogji automjetin që ishte përdorur për atentatin. Në automjet janë gjetur gjurmë ADN-je që përputhen me profilin e Ilir Beqarajt dhe të “Pole Qorrit”. Pjesë të ngjarjes janë fiksuar edhe në pamje filmike.
Ilir Beqarajt i janë ngritur disa akuza, përfshirë “Vrasje me paramendim në bashkëpunim”, “Mbajtje pa leje dhe prodhim të armëve” dhe “Falsifikim dokumentesh identiteti”.
Gentian Bejtja u qëllua me mbi 50 plumba, të cilët e goditën në fytyrë dhe trup, duke i shkaktuar vdekjen e menjëhershme. Ai dyshohet se kishte dijeni për ngjarje të rënda kriminale të ndodhura gjatë dekadës së fundit, çka e bënte objekt të interesit për grupet kriminale.
