Pesidenti amerikan Donald Trump ka kërkuar që Departamenti i Drejtësisë të hetojë paraardhësin e tij, Barack Obama, duke e akuzuar për manipulimin e informacionit në lidhje me ndërhyrjen ruse në zgjedhjet presidenciale të vitit 2016.
Deklaratat e forta të Trump u bënë gjatë një takimi në Shtëpinë e Bardhë me presidentin e Filipineve, Ferdinand Marcos Jr., ku ai iu referua një raporti të publikuar nga drejtoresha e Inteligjencës Kombëtare, Tulsi Gabbard. Sipas Trump, raporti përmban referime për ndjekje penale ndaj zyrtarëve të administratës Obama, të cilët akuzohen për pjesëmarrje në një “konspiracion tradhtie”.
“Bazuar në atë që kam lexuar, personi i parë që duhet hetuar është Presidenti Obama. Ai e filloi këtë,” tha Trump, duke akuzuar Obamën si “liderin e bandës” që përfshinte edhe figura të tjera të njohura të administratës së tij, si: Joe Biden, James Comey (ish-drejtor i FBI), James Clapper (ish-drejtor i Inteligjencës Kombëtare) dhe John Brennan (ish-drejtor i CIA).
Trump deklaroi më tej se Gabbard e kishte informuar për ekzistencën e mijëra dokumenteve të tjera që pritet të publikohen dhe që sipas tij do të vërtetojnë se hetimi ndaj tij ishte i sajuar.
Raporti i përmendur nga Trump mbështet pretendimet e tij se administrata Obama kishte orkestruar një fushatë të padrejtë ndaj tij për lidhje me ndërhyrjen ruse në zgjedhjet presidenciale. Deri tani, as Departamenti i Drejtësisë dhe as përfaqësues të Obamës nuk kanë reaguar zyrtarisht ndaj akuzave.
