Shëndeti i Donald Trump ka rikthyer edhe një herë debatin publik, pasi imazhe të publikuara së fundmi në rrjet tregojnë kyçet e këmbëve të tij të enjtura gjatë një ndeshjeje futbolli në New Jersey.
Presidenti amerikan, tashmë 79 vjeç, ndodhej në stadium për të ndjekur finalen mes Chelsea dhe Paris Saint-Germain, kur u fotografua i ulur, me kyçin e këmbës së djathtë dukshëm të fryrë.
Pamjet shkaktuan një valë të re spekulimesh në rrjete sociale, me përdorues dhe madje edhe mjekë që ofronin interpretime nga distanca, nga arsye të pafajshme si qëndrimi për një kohë të gjatë në këmbë nën diell, deri te hipoteza për probleme serioze shëndetësore si sëmundje të zemrës, qarkullim të dobët të gjakut, trombozë, madje edhe diabet ose përdhes.
Ky nuk është rasti i parë që shfaqet shqetësimi publik për shëndetin e Trump. Më herët janë vënë re shpesh edhe shenja të errëta në duart e tij, që zakonisht mbulohen me grim, çka ka ngritur dyshime për injeksione apo trajtime mjekësore të fshehura.
Përballë këtyre zërave, Shtëpia e Bardhë ka përsëritur se Trump gëzon shëndet të mirë dhe mbetet energjik në aktivitetet e tij, duke punuar gjatë gjithë ditës dhe shpesh edhe natën. Lidhur me shenjat në duar, zëdhënësit kanë deklaruar se ato vijnë si pasojë e shtrëngimeve të shumta të duarve në takime publike dhe jo nga trajtime mjekësore.
Ndërkohë, regjimi i tij i përditshëm vazhdon të jetë në vëmendje: dieta e pasur me produkte të përpunuara, përfshirë konsumimin e rregullt të Coca-Cola-s (të cilës ai thuhet se dëshiron t’i ndryshojë recetën me sheqer kallami), mungesa e një rutine të rregullt fizike përveç golfit, dhe pesha e tij mbi mesataren, janë faktorë që shtojnë dyshimet.
Megjithatë, mjekët personalë të Trump kanë mohuar vazhdimisht se ai vuan nga ndonjë sëmundje e veçantë, duke theksuar se kontrollet vjetore nuk kanë zbuluar probleme serioze.
Pavarësisht deklaratave zyrtare, imazhet dhe komentet në rrjet po e mbajnë të hapur debatin mbi gjendjen e tij shëndetësore, një temë që, siç ka ndodhur shpesh edhe më parë, vështirë se do të shuhet lehtë.
