Autoritetet zvicerane kanë konfirmuar arratisjen e një të burgosuri shqiptar 23-vjeçar në qytetin Baden të kantonit Aargau. Ngjarja ka ndodhur të enjten në mëngjes, pak para orës 09:00, gjatë momentit të transportit të të burgosurve.
Sipas njoftimit zyrtar, i riu shqiptar u largua nga vendi i ngjarjes pak para se të hipte në automjetin e policisë. Ai kishte ende prangat në duar dhe është parë për herë të fundit me pantallona të zeza, xhaketë të zezë me mëngë me motive të bardha dhe këpucë të bardha.
Policia kantonale e Aargaut ka nisur një operacion kërkimi dhe u ka bërë thirrje qytetarëve që mund të kenë parë diçka të dyshimtë ose kanë informacion, të kontaktojnë menjëherë autoritetet. Ndërkohë, hetimet për zbardhjen e rrethanave të arratisjes janë në vijim.
