Kryeministri Edi Rama ka zhvilluar sërish një vizitë në qytetin e Vlorës këtë të mërkurë, duke zgjedhur kësaj here një mjet të pazakontë transporti – një helikopter ushtarak tip “Cougar”.
Zbritja është kryer në ish-fushën e aviacionit, prej nga ku më pas Rama është shoqëruar me eskortë drejt vilës qeveritare. Mesa duket Rama edhe vetë është i mërzitur me rrugët copë-copë dhe tashmë ka filluar të qarkullojë me helikopter.
Për të shmangur infrastrukturën e shkatërruar dhe trafikun e rënduar, Rama shton shpenzimet qeveritare duke përdorur sipas tekave të tij helikopterët e ushtrisë të cilët kanë një kosto të lartë.
Tashmë që “blindoi” mandatin e katërt, Rama po sillet si “padron i Shqipërisë” duke marrë vendime në kundërshtim me ligjin dhe duke shkelur Kushtetutën, referuar prishjeve të banesave në Theth dhe valën e shkarkimeve në të gjithë bashkitë e vendit.
Kjo vizitë vjen pas asaj të datës 3 korrik, kur kryeministri pati një qëndrim kritik ndaj administratës vendore, duke shkaktuar lëvizje dhe reagime në Bashkinë e Vlorës. Ende nuk është e qartë nëse vizita e sotme ka një karakter pune, apo nëse Rama ka zgjedhur të kalojë disa ditë pushimi në vilën qeveritare.
Zyrtarisht, nuk ka pasur njoftime për ndonjë takim apo aktivitet të planifikuar me autoritetet lokale.
