Një zjarr shkatërrimtar që përfshiu një qendër për të moshuar në qytetin Fall River të Massachusetts-it ka shkaktuar të paktën nëntë viktima dhe mbi 30 të plagosur, konfirmuan zyrtarët lokalë.
Ngjarja ndodhi të dielën në mbrëmje, rreth orës 21:50 sipas kohës lokale (02:50 GMT të hënën), në ndërtesën “Gabriel House”, ku strehoheshin rreth 70 banorë.
Shefi i zjarrfikësve të Fall River, Jeffrey Bacon, e cilësoi zjarrin si një “tragjedi të paimagjinueshme”, duke thënë se ai u përhap me shpejtësi dhe u kthye në një flakë të fortë dhe të pamëshirshme.
“Ishte shumë i shpejtë, ishte thjesht një zjarr shumë i fortë”, tha ai për gazetarët, ndërsa përshkroi skena dramatike me banorë të moshuar që luteshin për ndihmë dhe dilnin në dritare për shpëtim.
Sipas autoriteteve, disa nga viktimat humbën jetën në vendngjarje, ndërsa të tjerët ndërruan jetë më vonë në spital. Shkaku i zjarrit mbetet ende nën hetim. Zyrtarët theksuan se ndërtesa ishte e pajisur me sistem spërkatës, por tymi u përhap në të gjithë strukturën trekatëshe duke e vështirësuar evakuimin.
Kryebashkiaku i Fall River, Paul Coogan, tha se rreth 70 persona ndodheshin brenda në momentin e shpërthimit të zjarrit, dhe paralajmëroi se “tymi vret më shumë njerëz sesa vetë flakët”. Ai u bëri thirrje qytetarëve që të dëgjojnë sinjalet e detektorëve të tymit dhe të reagojnë menjëherë.
Pavarësisht ndërhyrjes së shpejtë të forcave të zjarrfikësve, të cilët përdorën shkallë për të shpëtuar të moshuarit, përfshirë edhe ata në karrige me rrota, një person mbetet në gjendje kritike në spital. Pesë zjarrfikës që u plagosën gjatë operacionit janë tashmë jashtë rrezikut për jetën.
Guvernatorja e Massachusetts-it, Maura Healey, vlerësoi punën heroike të forcave të emergjencës, duke thënë se “pa guximin e zjarrfikësve, policisë dhe personelit mjekësor, humbjet e jetëve do të ishin shumë më të mëdha”.
