“Skema e Final Four me gjithë kritikat dhe skepticizmat solli më shumë emocion, rivalitet deri në fund, u rrit ndjeshëm ndjekia mediatike, pati më shumë tifozë dhe interesi i publikut u shtua dukshëm,” – kështu u shpreh Armand Duka, në asamblenë e FSHF-së me 25 qershor.
Por rreth 3 javë pas kësaj deklarate, skema e “suksesshme” që aplikohet pas përfundimit të kampionatit dhe që përcakton fituesin, ka shumë të ngjarë të ndryshohet.
Pas një takimi të mbajtur në ambientet e FSHF, me drejtuesit e klubeve të Superligës, është propozuar një tjetër format. Edhe pse publikisht janë shprehur të kënaqur, edhe në federatë e kanë kuptuar se skema aktuale, e shumë kritikuar edhe nga vetë protagonistët, lë për të dëshiruar dhe se rezultatet nuk kanë qenë aspak pozitive.
Kjo sepse 36 javë kampionat zerohen, duke u luajtur 2 gjysmëfinale, një finale dhe ndeshja për vend të 3 dhe 4.
Tani sipas të gjitha gjasave skema e re e ‘Final-Four’ do të jetë në formë kampionati. Pas 36 javësh, skuadrat nga vendi i parë deri në vendin e 4 do të marrin pjesë në finalen me 4, por me ndryshimin se pikët do të përgjysmohen.
Katër skuadrat do përballen mes tyre në një mini-kampionat me pikë (gjashtë ndeshje në total) dhe në bazë të rezultateve do mësohet edhe skuadra kampione dhe ato që shkojnë në Evropë.
Ndryshe nga dy sezonet e kaluara, “Final 4” nuk do vendoset me gjysmëfinale dhe finale, por me garë pikësh.
