Departamenti Amerikan i Shtetit ka reaguar pas vdekjes së shtetasit amerikan Saif Musallat në Bregun Perëndimor, i cili dyshohet se u rrah për vdekje nga kolonë izraelitë në qytetin Sinjil, në veri të Ramallahut.
Sipas agjencisë palestineze të lajmeve WAFA, duke cituar Ministrinë e Shëndetësisë, Musallat, një i ri në të njëzetat, ndërroi jetë si pasojë e dhunës së ushtruar nga kolonët izraelitë. Reuters raporton se gjatë të njëjtit sulm mbetën të plagosur edhe dhjetë persona të tjerë.
Ushtria izraelite ka deklaruar se po heton incidentin, duke pretenduar se përplasja nisi pasi kolonët u sulmuan me gurë nga banorë palestinezë.
Gjatë përplasjeve, sipas autoriteteve palestineze, humbi jetën edhe një tjetër i ri, Muhammad al-Shalabi, i cili dyshohet se u qëllua me armë zjarri dhe u la i gjakosur në tokë pa marrë ndihmë për disa orë.
Kombet e Bashkuara dhe organizata të të drejtave të njeriut e konsiderojnë ndërtimin e vendbanimeve izraelite në Bregun Perëndimor si të paligjshme dhe në kundërshtim me të drejtën ndërkombëtare.
